అడుగుదాటి కదల

అడుగుదాటి కదల నియ్యను
నా కభయ మియ్యక నిన్ను విడువను || అడుగు ||

గడియ గడియకు తిరిగి తిరిగి
యడిగితిని వేసార వచ్చెను
గడువు తప్పిన నేను నిక బహు
దుడుకుతనములు సేయుదును నిను || అడుగు ||

కుదురుగా కూర్చుండనియ్యను
కోపమొచ్చిన భయముచెందను
మది నెరింగీ యుండుమిక మొగ
మాట మేమియు లేదుగద నా
హృదయకమలమునందు నీ మృదు
పదములను బంధించివేతును || అడుగు ||

రేపు మాపని జరిపితే నే
నపుజేసెడివాడగాను
ప్రాపు నీవని నమ్మి కొలిచిన
పాపముల నెడబాపి దయతో
తేప తేపకు నీదు మోమిటు
జూపకుండిన నోర్వసుమ్మి || అడుగు ||

పతితపావన బిరుదు లేదా
పాలనము నను సేయరాదా
ప్రతి దినంబును దేవ నిను భూ
పతి వటంచును వేడినను నీ
హిత జనంబులు వచ్చి నను బ్రతి
మాలినను విడబోను నిన్ను || అడుగు ||

రాక్షసాంతక భక్తవరదా
సారసాక్ష సుజనరక్షక
ఈ క్షణంబున దీనజనుడని
మోక్షమియ్యక యుంటివ నిను
సాక్షిబెట్టియు నేడు నేనొక
దీక్షచే సాధింతు నిన్ను || అడుగు ||

భూరి భద్రాచల నివాసా
భుజగశయనా భక్తపోష
కూరిమిగ నిను విడిచిపెట్టిన
ధరణిలో భద్రాద్రిరాఘవ
రామదాసుం డనెడి నామము
మారుపేరున పిలువు నన్ను || అడుగు ||


Download