దశరధరామ గోవింద

దశరధరామ గోవింద నన్ను దయజూడు పాహి ముకుంద || దశరధ ||

దశముఖ సంహార ధరణిజపతి రామ
శశిధర పూజిత శంఖచక్రధర || దశరధ ||

మీ పాదములే గతి మాకు మమ్మేలుకో స్వామి పరాకు
మా పాల కలిగిన శ్రీపతి ఈప్రొద్దు కాపాడి రక్షించు కనకాంబరధర || దశరధ ||

నారాయణ వాసుదేవ నిను నమ్మితి మహానుభావ
గరుడగమన హరి గజరాజ రక్షక పరమపురుష భక్త పాప సంహరణ || దశరధ ||

తారకనామమంత్రము రామదాసులకెల్ల స్వతంత్రము
ఇరవుగ కృపనేలు యిపుడు భద్రాద్రిని స్థిరముగ నెలకొన్న సీతామనోహర || దశరధ ||


Download