కరుణించు దైవలలామ అహో
పరమ పావననామ పట్టాభిరామా || కరుణించు ||
అన్నవస్త్రము లిత్తుమనుచు దొర
లన్నారు మనిచెదమనుచు ఆయు
రన్నం ప్రయచ్ఛతి యనుచు నూర
కున్నాను నీవే మాకున్నా వనుచు || కరుణించు ||
మరియింత కాలమ్ముదనుక మిమ్ము
మరచితిననుచు తప్పుతలచక మమ్ము
దరిజేర్చుడని వేడితిని మీది
శరణాగత త్రాణ బిరుదు గనుక || కరుణించు ||
పరుల గొలుచుటకన్న ఇల భద్ర
గిరి రాఘవుల వేదుకొనుట ఇహ
పరములకు దారియని వింటినే
దరహాసముఖ రామదాసపోష || కరుణించు ||