అబ్బబ్బా దెబ్బలకు నోర్వలేనురా
జబ్బుసేయకురా తబ్బిబ్బాయెనురా
అట్టె నిను పూజించినట్టి చేతులనిదిగో
కట్టె బెట్టి కొట్టిరెటు తాళుదునయ్య || అబ్బబ్బా దెబ్బలకు ||
రట్టుతీర్చీవేళ గట్టిగా నీవునను
జెట్టుబట్టి యేలుకో పట్టాభిరామ || అబ్బబ్బా దెబ్బలకు ||
శరణాగతత్రాణ బిరుదాంకుడవుగాద
శరధిబంధించిన శౌర్యమేమాయెరా || అబ్బబ్బా దెబ్బలకు ||
పరంధామ నీ పాదములాన వినరా
పరులకొక్క కాసు నే నివ్వలేదురా || అబ్బబ్బా దెబ్బలకు ||
భద్రాద్రి శ్రీరామ నీ నామమెపుడు
ప్రేమతో భజియించు రామదాసునేలు || అబ్బబ్బా దెబ్బలకు ||